कोथिंबीर वडी

कोथिंबीर वडी

साहित्य – १ मोठी जुडी कोथिंबीर, साधारणपणे २ वाट्या बेसन (साधारण यासाठी म्हणते आहे की कोथिंबिरीची जुडी किती मोठी आहे त्यावर हे प्रमाण अवलंबून ठेवा), अर्धा टीस्पून हळद, प्रत्येकी २ टीस्पून तिखट, धणे पूड, जिरे पूड, १ टेबलस्पून तीळ, अर्धा टीस्पून साखर, १ टीस्पून तेल, मीठ चवीनुसार
तळण्यासाठी तेल

कृती –
१) कोथिंबीर निवडून स्वच्छ धुवा आणि कोरडी होण्यासाठी स्वच्छ पंचावर पसरून ठेवा.

२) कोथिंबिरीतलं पाणी पूर्ण सुकलं की मग ती बारीक चिरून घ्या. त्यात हळद, तिखट, मीठ, धणे-जिरे पूड, साखर, मीठ, तीळ असं सगळं घाला.
३) चांगलं एकजीव करून पंधरा मिनिटं बाजुला ठेवून द्या. जरा वेळानं हे मिश्रण ओलसर होईल.
४) आता त्यात बेसन घाला. बेसन या मिश्रणात मावेल तसं कमीजास्त करा. गरज असल्यास थोडंसं पाणी घालून पीठ भिजवा. साधारणपणे भाकरीच्या पिठापेक्षा थोडं घट्ट भिजवा. त्याला १ टीस्पून तेलाचा हात लावून त्याचे रोल करून घ्या.
५) कुकरमध्ये जरा जास्त पाणी घालून पाणी उकळायला ठेवा. कुकरच्या भांड्याला तेलाचा हात लावून हे रोल त्यात ठेवा.
६) भांडं कुकरमध्ये ठेवून शिटी न लावता २० मिनिटं रोल वाफवून घ्या.
७) थंड झाल्यावर पातळ वड्या कापा.
८) तेल नको असल्यास नुसत्या उकडलेल्याही छान लागतात. नाहीतर पॅनमध्ये शॅलो फ्राय करा किंवा कढईत तेल कडकडीत तापवून मस्त तळून घ्या.

कोथिंबीर वडी

कोशिंबीर वडी तयार आहे.
या कोथिंबीरवड्यांची भाजीही छान लागते. त्यासाठी कढईत नेहमीसारखी फोडणी करा. त्यावर या वड्या कुस्करून घाला. जरा पाण्याचा हबका मारून मंद आचेवर वाफ आणा. वरून ओलं खोबरं घाला. किंवा नेहमीसारखी फोडणी करा. त्यात या वड्या घाला. थोडा चिंचेचा कोळ आणि गूळ घाला. ३-४ वड्या कुस्करून घाला. एखादा कप पाणी घाला. थोडा काळा मसाला घाला. चांगलं उकळा. कोथिंबीर वड्यांची भाजी तयार आहे.

हे सगळे पदार्थ करून बघा आणि कसे झाले होते ते नक्की कळवा. फोटोही पाठवा.
सोशल नेटवर्किंगवर ही पोस्ट शेअर करताना या ब्लॉगचा जरूर उल्लेख करा.