मसाला लायब्ररीतलं जेवण

याच वांद्रे कुर्ला कॉम्प्लेक्समध्ये मसाला लायब्ररी हे फाइन डायनिंग रेस्टॉरंट आहे. हे रेस्टॉरंट जिग्स कालरा या ख्यातनाम शेफचं आहे. सध्या इन असलेलं फ्यूजन फूड या रेस्टॉरंटमध्ये मिळतं. म्हणजे भारतीय आणि पाश्चिमात्य पदार्थाचं मिश्रण करून केलेले पदार्थ किंवा भारतातल्याच दोन प्रांतातल्या पदार्थाचं मिश्रण करून केलेले पदार्थ. मी आधीही तीन-चारदा इथे जेवलेले आहे. नुकतंच माझ्या नव-याचा निरंजनचा मित्र अनीश प्रधान आणि त्याची बायको शुभा मुद्गल यांच्या बरोबर आम्ही इथे जेवायला गेलो होतो. अनीश निरंजनचा कॉलेजमधला मित्र. शिवाय अफलातून विनोदबुध्दी असलेला. शुभाजी (मी सहसा कुणाला जी लावत नाही पण इथे लावण्याचा मोह होतो आहे) जितक्या सुंदर गातात तितक्याच सुंदर बोलतातही. अनीश हा नामवंत तबलावादक आहे. त्यानं हल्लीच एकोणीसाव्या शतकातल्या मुंबईतल्या हिंदुस्थानी शास्त्रीय संगीताची परंपरा या विषयावर पुस्तक लिहिलं आहे.या दोघांची खासियत अशी की हे दोघेही आपापल्या क्षेत्रात इतके नावाजलेले असूनही अजिबात मोठेपणा मिरवत नाहीत. अगदी हिंदी चित्रपटसंगीतापासून, वृत्त वाहिन्या, नवीन पुस्तकं, टीव्ही मालिका, नवीन तंत्रज्ञान आणि अर्थातच खाद्यसंस्कृती अशा वेगवेगळ्या विषयांवर गप्पा किती तरी रंगल्या. फार मजा आली.

या रेस्टॉरंटनं सध्या शेफ्स टेस्टिंग मेन्यू सुरू केला आहे. व्हेज आणि नॉनव्हेज अशा दोन्ही प्रकारांमध्ये तो मिळतो. वेगवेगळ्या प्रकारची स्टार्टर्स, मेन कोर्स आणि मग अर्थातच डेझर्ट. या जेवणाची सुरूवात झाली ती मश्रूम चायनं. हो मश्रूमचा चहा! म्हणजे त्यांनी चहासारखा सगळा जामानिमा आणला. कपांमध्ये सुकी श्रेडेड मश्रूम्स घातली. त्यावर पावडर फॉर्ममध्ये असलेलं इटालियन तेल घातलं आणि मग त्यावर मश्रूम स्टॉक घातला. या मश्रूम चायची चव अफलातून लागत होती. त्यानंतर दाक्षिणात्य तैरसादम आणि त्यावर झुकिनी, अस्पॅरेगस आदी भाज्या ब्लांच करून घातल्या होत्या आणि बरोबर मसाला केळा वेफर्स, मस्त लागत होतं. नंतर एक पदार्थ होता तो आपल्या डाळ-खिचडीचे रिसोटो (भाताचा इटालियन प्रकार) बॉल्स करून ते तळले होते. असे तीन-चार प्रकारचे स्टार्टर्स खाल्ल्यानंतर मलबारी परोटा(असाच उच्चार करतात) आणि टोमॅटो चटणी, मसाला लायब्ररीची सुप्रसिध्द काली डाळ (खरंच फार अप्रतिम असते), दही वडा असा मेन कोर्स खाऊन तृप्त झालो. शेवटी रसमलाईचं एक आणि मोतीचूर काव्हियार असं एक डेझर्ट खाल्लं. फारच अफलातून जेवण होतं.

या जेवणाचे काही फोटो मी तुमच्याबरोबर शेअर करते आहे. फोटो मोबाइलवर काढलेले असल्यानं नेहमीइतके स्पष्ट आलेले नाहीत.